Ka Baibyl Khasi

Ka Baibyl Khasi: Ka ktien ‘Baibyl’ ka wan na ka plural ‘biblia’ jong ka ktien Grik ‘biblion’, kaba mut ‘kot rit’. Kumta, ha ka Grik, ka ktien ‘Baibyl’ ka mut ‘Ki Kot rit’. Kane ka long ka badei, namarba ka Baibyl kam long tang kawei ka kot, hynrei ka jinglum lang ïa ki 73 tylli ki ‘kot rit’: 46 tylli na ki la thoh shuwa ka jingwan u Khrist, 27 tylli hadien u Khrist. Hynrei ki nongthoh Latin ki la shim ïa kane ka ktien Grik ‘biblia’ bad ki la pynlong ïa ka ka kyrteng singular: ‘Biblia’, tang kawei ka kitab. Dei na ka Latin ba ngi la ïoh ïa ka kyrteng Phareng ‘The Bible’, bad ka kyrteng Khasi ‘Ka Baibyl’—ka Kitab bakordor tam, ka Kitab jong ki kitab, KA KITAB !

Ki nongthoh: Bunsien ngim tip thikna ïa ki nongthoh jong ki kitab Baibyl. Ïa ka por ruh ha kaba la thoh ïa ki ym da tip thikna. Hynrei ngi tip ba la thoh ïa ki hapdeng 1000 snem shuwa u Khrist bad 100 snem hadien u Khrist.

Ki ktien jong ka Baibyl: Ïa ka Jutang Bathymmai baroh kawei la thoh ha ka ktien Grik; ïa ka Jutang Barim ha ka ktien Hebru, lait noh katto katne ki kitab (Judith, Tobit, 1 & 2 Makabi, Jingstad, Sirak, Barukh, Daniel 13-14) ïa kiba la thoh, ne kiba la wan poi sha ngi, tang ha ka Grik. Katto katne ki lynnong u Jeremiïa, Esra bad Daniel la thoh ha ka Aramaik.

Ar tylli ki Jutang: Ïa ka Jutang Barim hapdeng u Blei bad u briew la ïateh nyngkong bad u Abraham (Jen 15:18); nangta bad u Moses (Eks 24:8), mynba u Blei U la ai ïa ka Aiñ, U la khot ïa lade u Blei jong ki Israel, bad U pynlong ïa ki Israel u paid jong U. Ïa kane ka Jutang la pynskhem da ka snam jong ki mrad ba la kñia. Ïa ka Jutang Bathymmai la pynskhem da ka snam jong u Khrist ba la kñia (Heb 9:15t), kaba la siewspah ïa u briew na ka pop bad na ka jingïap. Da kane ka jingpynïasuk, u briew u la kylla biang u khun jong u Blei, u Blei pat u Kpa jong u.